Barredromoa egin du UEUk zientzia eta umorea bat eginez

2025eko martxoaren 31

Barredromoa dibulgazio-ekitaldia antolatu du laugarren aldiz UEUk, Eibarko Klub deportiboarekin elkarlanean. Zientziak, euskarak eta umoreak hirukote ederra osatzen dutela argi geratu da beste behin.

Idoia Torregarai Martija UEUko Komunikazio-arduradunaren gidaritzapean, bost bakarlarik parte hartu dute:

Lehen bakarrizketaria Xabier Arraztoa Lazkanotegi Ingenaria izan da. Doktoretza-tesia egiten ari da IKERLANeko "Sistema Elektroniko Txertatuen" alorrean, litio-ioizko bateriak kudeatzeko sistemen segurtasun funtzionalari buruz eta horri buruzko aurkezpena egin du.

Txalo zaparrada artean etorri da bigarren ikertzailea: Miren Aldasoro Lezea, Biologian graduatua. “Ferra-saguzarren ekologia trofikoa eta izurriteen kontrola teknika molekularren bitartez” izeneko proiektuan ari da doktoretza-tesia egiten, eta saguzarren kakak biltzen zituen garaia faltan botatzen duela aitortu du.

Hirugarren hizlaria Claudia Torralba Rubinos Itzulpengintza eta Interpretazioko doktorearena izan da. Argi geratu zaigu itzultzaile automatikoek oraindik ez dituztela giza-itzultzaileak ordezkatuko.

Leyre Rojo Horrillok Euskal Ikasketetako gradua du eta Euskal Hizkuntzalaritza eta Filologia doktoregaia da. Erronkariera ez, baina entzuleak biziberritu ditu.

Azken hizlaria Maddi Alberdi San Martin eibartarra izan da. Gizarte Langintzako Gradua du eta gaur egun "Feminismoaren eraginak euskal nazionalismoaren diskurtsoan" aztertzen ari da tesian. Argi utzi du nazionalismoaren gaia "mobida" bat dela.