Argitaletxea
Dagoeneko ehunka izenburu ditugu gure katalogoan liburu eta aldizkarien artean, eta unibertsitate-mailako euskarazko testugintzan dekano bilakatu gara.
Helburuak
UEUren helburua hirukoitza da:
Unibertsitate-liburuen prozesu osoa euskaraz egiteko aukera eskaintzea (sortzen denetik produktua irakurlearen esku dagoen arte).
Unibertsitate-mailako azpiegitura bibliografikoa aberastea.
Arlo teknikoetan euskarazko terminologia eta sintaxia finkatzen laguntzea.
Liburuak ( > )
UEU 1977. urtean hasi zen liburuak argitaratzen eta geroztik mota guztietako generoetan aritu da: testuliburuak, saiakerak, goi-mailako dibulgazioa, erreferentziazko obren itzulpenak, doktorego-tesiak...
Hainbat erakunderekin elkarlanean egin du bidea UEUk. Kasu batzuetan liburu edo produktu zehatzetarako eta beste batzuetan iraupen luzeagoko hitzarmenen bidez.
Oro har, liburuak argitaratu ondoko bosgarren urtean denen eskura jartzen dira UEUren liburutegi librean, doan irakurri edota deskargatzeko.
Aldizkariak
1990. urtean argitaratu zuen UEUk lehenengo aldizkaria eta ordutik euskal komunitate zientifikoaren garapenerako tresna diren beste aldizkari batzuk ere sortu dira:
1990. Uztaro, Giza eta Gizarte Zientzien aldizkaria.
2003. Kondaira.eus Historiari buruzko aldizkari elektronikoa.
2009 Aldiri. Arkitektura eta abar (2021ean azken alea). UEUko Arkitektura Sailaren eskutik.
2017. Osagaiz. Osasun-zientzien aldizkaria. Osasungoa Euskalduntzeko Erakundearekin (OEE) batera sortua.
Argitalpen akademikoei dagokienez, UEUren argitalpen-zerbitzuak kalitate-irizpideetan oinarritu du bere jarduna. Horretarako UEUk badu Argitalpen Batzordea, argitalpen-zerbitzuari bere zereginean laguntzen diona eta argitaratuko diren lanen hautaketa egiten duena.
Argitalpen Batzordea UEUko zuzendariak, UEUren Talde Eragileko ordezkari batek, aktibo dauden aldizkarien zuzendariek zein UEUren argitalpen eta egiturarekin harreman estua duten hainbat adituk osatzen dute. Horiekin batera argitalpenen arduradunak eta UEUko hizkuntza-arduradunak ere bai.
Argitalpenen aukeraketa eta ebaluazioa kalitate-irizpideen arabera bermatzeko protokolo zehatz eta agerikoa dugu. UEUn argitaratu nahi duen egileak, beraz, azterketa eta ebaluaziorako erabiliko den prozesuaren berri izango du, baita UEUren argitalpena esku artean hartzen duen irakurleak ere.
UEUren argitalpenetan dagoen lehen konpromisoa euskararekin da. UEUk euskaraz argitaratuko du bere material guztia. Horrez gain, hizkuntzaren kalitatea bermatzeko eta corpusaren garapen eta aberastasuna ziurtatzeko, zuzentzailearen gainbegirada izango dute argitalpen guztiek.
UEUk Zientzia Irekia eta Sarbide Irekiarekin konpromisoa hartzen du; erakundearen baliabideek posible egiten duten heinean, bere materialak libreki sarean eskuragarri jarriz.
Argitalpen Batzordeak eta argitaletxearen kolaboratzaileek orokorrean Argitalpenen Etika Batzordeak (Committeeon Publications Ethics, COPE) ezarritako Kode Etikoa eta Jardunbide Egokiei jarraitzen diete. UEUren argitalpenen Argitalpenetarako Jardunbide Gida kode horretan oinarritzen da. UEUren Berdintasunerako konpromisoa jasotzen du, besteak beste, aipatu jardunbide-gidak.
UEUren argitalpenak UEUren webguneko dendan zein Euskal Herri osoko hainbat liburu-dendatan saltzen dira. Era berean, UEUk lanon ahalik eta zabalkunderik handiena egiteko konpromisoa hartzen du.
