Txiotesia

Txiotesia euskal ikertzaile gazteen lanak gizarteratzeko eta haiei izen-abizenak jartzeko UEUk 2013az geroztik antolatzen duen lehiaketa da. Ikertzaile gazteen sarea sendotzea eta zientziaren dibulgazioa euskaraz sustatzea ere badira egitasmoaren helburuak.

Parte-hartzaileek Mastodon-etik edo X/Twitter-etik zabaldu behar dute beren ikerketa-lana eta bi irabazle izendatuko dira: Ikertzaile ulergarriena (500 €) eta Ikertzaile originalena (300 €).

2024ko maiatzaren 14an egin da 7. edizioa eta nobedadeekin etorri da:

UEU antolatzailea. Aurreko edizioetan UEUren Unibertsitatea.net ataritik egin zen deialdia, baina hemendik aurrera UEUren sare sozialetako kontu orokorretatik egingo da.
Sare sozial bi. Parte hartzeko sare sozial biren artean aukeratu daiteke: Mastodon edo X/Twitter. Batetik edo bestetik. Ez bietatik.
Udaberrian. Aurreko edizioak udazkenean egin badira ere, maiatzaren 14an egingo da 7.a.

38 euskal ikertzailek parte-hartu dute bertan (ikusi egunak emandako datuak) eta ekarpen horiek guztiak Txiotesia7 atalean dituzue bilduta.

Parte hartzeko argibideak

ARAUAK

Parte hartzeko Mastodon edo X/Twitter kontu publikoa izan behar da.
Tesia 2021-2024 urte bitartean (biak barne) aurkeztuta izan behar du edo gaur egun tesia egiten aritu.
Parte-hartzea bi sare sozialetatik egin daiteke, Mastodonetik edo X/Twitter-etik. Batetik edo bestetik, ez bietatik.
Mastodonetik parte hartuz gero, 3 tutetan azaldu behar da norberaren ikerketa-lana, eta beraz, ez dira kontuan hartuko 3 tut baino gutxiago edo gehiago erabilitako ikertzaileen parte-hartzeak.
X/Twitter-etik parte hartuz gero, 6 txiotan azaldu behar da norberaren ikerketa-lana, eta beraz, ez dira kontuan hartuko 6 txio baino gutxiago edo gehiago erabilitako ikertzaileen parte-hartzeak.
Tesia edozein hizkuntzatan landua izan daiteke, baina lehiaketan euskara hutsean parte hartu behar da. Mezuak euskaraz idatzi behar dira.
Lehiaketa maiatzaren 14an egingo da eta egunean bertan goizeko 09:00etatik 21:00etara bitartean idatzi behar dira mezuak. Hauek aldi batean edo tarteka bidal daitezke, baina beti zehaztutako ordutegiaren barruan.
Mezu bakoitza zenbatu egin behar da: 1, 2, ... mezuaren aurretik jarrita.
Mezu bakoitzaren amaieran derrigorrez jarri behar da #txiotesia7 traola.
Lehenengo mezuan tesiaren izenburua idatzi behar da, hau ere euskaraz.
Azken mezuak tesiaren emaitza edo ondorioa jaso beharko du, edo hasi berri diren ikerketen kasuan, planteatzen den hipotesia.
Tesiaren zati bati edo proiektu osoari buruz aritzeko aukera dago.
Ez dira onartuko mezuak ordezkatuko dituzten testu osagarri, dokumentu atxiki edo ikus-entzunezko baliabidetara bideratutako estekak.
Mezuen aurkezpena aberasten duten elementuak erabili ahal izango dira, betiere irakurlearen arreta erakartzeko, informazioa ilustratzeko edota mezuak erakargarriago egiteko helburuarekin (estekak, emotikonoak, bideoak, irudiak, gif animatuak, etab.).
Parte-hartzaileen eta antolatzaileen arteko hartu-emana errazteko lehiaketa-egunean jarraitu UEUren Mastodon edo X/Twitter kontua (parte hartzeko erabiliko duzun hori). Bertatik hainbat datu eskatuko dizkizugu: Izen-abizenak, zer/non/noiz ikertzen ari zaren eta e-posta helbidea.
Edozein zalantza edo informaziorako: komunikazioa@ueu.eus

SARIAK

EPAIMAHAIA

Bost kidek osatutako epaimahaiak baloratuko ditu mezu guztiak eta beren ardura izango da 7. edizioko irabazleak hautatzea. Hauek dira:

Bitor Alonso Fradua (Mundaka, 1983): Kazetaritzan lizentziatua da (EHU). Komunikazio politiko eta enpresarialean du masterra (Camilo Jose Cela unibertsitatea) eta Komunikazioan da doktorea (EHU). Gaur egun EHUko Kultura Zientifikoko Katedrako komunikazio-arduraduna da. Txiotesia lehiaketako 5. eta 6. edizioetako parte-hartzailea ere bada.
Galder Gonzalez Larrañaga (Barakaldo, 1982): Geologia ikasi zuen EHUn eta Primatologia Bartzelonako Unibertsitatean. "Euskal Pentsamendu Kritikoa XX. eta XXI. mendean" masterraz gain, UEUren "Humanitate Digitalen aditu titulua" ere egin du. Dibulgatzailea eta wikilaria da eta gaur egun doktoregaia da EHUko Filosofia Fakultatean.
Maite Luengo Aguirre (Arrigorriaga, 1995): Artearen Historian doktorea da eta EHUko Arte Ederren Fakultateko irakaslea. Euskal Herriko arte garaikidea ikertzen du genero-ikuspuntutik. UEUko Talde Eragileko kidea da eta Txiotesia lehiaketako 5. eta 6. edizioetako parte-hartzailea ere bada.
Jone Mitxelena Sanchez (Barakaldo, 1985): Biokimikan lizentziatua da (EHU) eta Biologia Molekularrean eta Biomedikuntzan da doktorea (EHU). Ikerbasque Ikertzailea da Genetika, Antropologia Fisikoa eta Animalien Fisiologia sailean (EHU).
Olatz Perez de Viñaspre Garralda (Gasteiz, 1987): Informatikaria eta Hizkuntzaren Azterketan eta Prozesamenduan doktorea da. EHUko irakasle eta ikertzailea eta UEUkidea da. Txiotesia lehiaketako 1., 3. eta 4. edizioetako parte-hartzailea ere bada.

SARI-BANAKETA EKITALDIA

Sari-banaketa 2024ko maiatzaren 30ean egingo da, Eibarko Markeskoa Jauretxean, 18.00etan. Online egindako lehiaketaren aurrez aurreko topalekua izango da ekitaldia, eta bertan irabazleak nortzuk diren jakiteaz gain, Miren Iraeta Orbegozo, Oihane Mendizabal Sandonís eta Sofia Marcos Basagoiti ikertzaileek egiten ari diren ikerketa-proiektuari buruzko hitzaldia emango dute: "Pottoken ikerketan trostan: ikerketa multidiziplinar baten esperientzia". Ikerketa-proiektu hori UEUk sustatu du BadaLab-en laguntzarekin.

Etortzekoa bazara eman izena komunikazioa@ueu.eus helbidean.

KOLABORAZIOA