Sexu-hezkuntza ikasgeletatik haratago

Adituek diotenez, sexu-hezkuntza beharrezkoa da bizitzako etapa guztietan baina, batez ere, haurtzaroan, nerabezaroan eta gaztaroan. Haur eta gazteen etorkizuneko baliagarriak izango dituzten tresnak eskaintzea da sexu-hezkuntzaren oinarrietako bat. Era berean, nor bere burua onartzea eta maitatzea bilatzen du sexu-hezkuntzak.

Horregatik sexu-hezkuntza egin dezaketen profesionalei formatzea helburu du ikastaro honek, baita familia, guraso, hezitzaile edota beste profesional batzuei ere. Haur eta gazteentzako erreferenteak diren bidelagunei pista metodologikoak ematea, alegia.

• Hezkuntza formaleko eta ez formaleko sexu-hezkuntzako ardatz nagusiak ezagutzea.
• Haur eta gazteen sexu-hezkuntzarako baliagarriak diren tresnak eta baliabideak eskuratzea.
• Talde lanaren bitartez gaur egungo haur, nerabe eta gazteen erreferenteei buruz hausnartzea.
• Haur eta gazteentzako erreferenteak diren bidelagunei pista metodologikoak ematea.

Arlo teorikoa:

1.Sexu-hezkuntzako ardatzak

• Sexua, sexualitatea eta erotika

• Hezitzailearen papera sexu-hezkuntzan.

2.Sexualitatea hezkuntza formalean, ez formalean eta informalean

• Ikus-entzunezko baliabideak

• Ipuinak

• Bestelako materiala edo tresnak

3.Haurtzaroaren eta nerabezaroaren erreferenteak

• Youtuberrak

• Influencerrak

• Familia

• Irakasleak

Arlo praktikoa:

4.Sexu-hezkuntza nola egin daiteke?

• Online ikastaro honek metodologia parte hartzailea eta aktiboa izango du.

• Moodle irakaskuntza-plataforman oinarrituta dagoen UEUren Ikasgela Birtuala erabiliko da. Plataforma honen bitartez, ikasleek ikastaroko informazio, eduki eta jarduera guztiak eskura izango dituzte, eta komunikazio tresna modura erabiliko da (adibidez: foroak eta txat pribatua erabiliz).

• Partaideen aurre ezagutzetatik abiatuko da, eta hausnarketa pertsonala elkarbanatzea sustatuko da.

• Ikastaroak alde teorikoa eta praktikoa uztartuko ditu: lau gai teoriko eta azken proiektua.

• Oinarri kontzeptualak idatzizko zein ikus-entzunezko materialekin landuko dira. Ondoren, landutakoaren inguruko praktikak proposatuko dira, ikasleen parte-hartzea eta hausnarketa kritikoa bultzatuz.

• Proposatutako ikas-jarduerak bideratzeko foroak irekiko dira, eta kideen parte hartzea bultzako da hainbat eduki partekatuz bertan.

• Ikastaroko gaitasunetan oinarritutako proiektua burutuko da, ikastaroa borobilduz. Ikastaroan zehar landutako eduki eta lortutako konpetentzi digitala islatuko du.

• Guztion lanak partekatu ondoren, berdinen arteko koebaluazioa egingo da.

• Ikasleek momentu oro irakaslearen jarraipena eta tutoretza izango dute, baita UEUko lantalde pedagogiko eta arduradun teknikoaren sostengua ere bai.

• Ikastaroa amaitzean, izandako aprobetxamenduari buruzko datuak aztertuko dira, hala nola, ikasle bakoitzak plataformara egindako atzipenak, osatutako jarduerak, jarduera asinkronoetan (eztabaida-foroak) egindako ekarpenak eta abarrak.

Sexu-hezkuntza egiten duten edo egin dezaketen profesionalei zuzendua bereziki, baita familia, guraso, hezitzaile edota beste profesional batzuei ere. Interesa duen orori orokorrean.