Unibertsitatearen barruak eta prekaritatea: Doktoregaion begirada akademiari.

Ikastaroaren gaia unibertsitateko ikerlarion prekarizazioa da. Berriki oihartzun gehiago badu ere, gaiari modu bateratuan heltzeko espazioen falta sumatu dugu. Ikastaroaren bidez, ikerlarien egoerari buruz egindako aldarrikapen, hausnarketa eta lortu diren aldaketak ezagutaraztea da asmoa, hitzaldi, mahai inguru eta tailerren bidez. Batetik, unibertsitatearen eta erakunde publikoen deriba neoliberalaren analisi bat egingo dugu, baita gaiaren gainean egindako zenbait ikerketaren berri eman ere. Bestetik, zehazki ikerlarien prekarizazioaren egoeraren eta dimentsioen nolakotasunak aztertu nahi ditugu. Horretarako, maila kolektibo / instituzionalean aritutako eragileen ekarpenak ezagutarazi, eta maila indibidualean, prekaritatea zeharkatzen duten egoeren argazki bat osatuko dugu. Azkenik, maila pertsonalean nola gorpuzten den ikusteko, tailer-dinamika batzuk ere eskainiko ditugu. Hori horrela, egoeraren diagnosia modu kolektiboan egin, eta etorkizunerako aliantzak artikulatzea da asmoa.

> Antolatzaileen elkarrizketa: "Ikertzaileen borrokari norabide bat ematea, eta hori modu kolektiboan jostea gustatuko litzaiguke"

• Unibertsitatearen eta ikerlarien egoeraren berri ematea. Gogoeta egitea prekaritatearen eta unibertsitateen joera neoliberalaren inguruan. Lortutako aldaketa, borroka eta aurreikusten den egoeraren berri ematea.
• Hausnarketarako topagunea sortzea. Auzia errealitate zehatzetan nola gorpuzten den ezagutzea: euskal lurralde guztiak aintzat hartzea. Eta gaia beste aldagai batzuekin nola gurutzatzen den aztertzea (begirada intersekzionala): amatasuna, arrazakeria, euskara...
• Aliantzak ehuntzea. Norberaren esperientziatik, norabide kolektiborako bidea zabaltzea.

Ikastaro honetan ondorengo edukiak landuko dira: prekaritatearen kokapena eta teorizazioa; unibertsitatearen genealogia eta azken urteetako joera neoliberala; doktoregaien borroka zehatzak eta hauen erantzun aukerak; Euskal Herriko unibertsitateetako doktoregaien egoera, bateratzea eta nazio begiradari begirako hausnarketa; ikerketan koiuntura zehatz eta ertzekoek izan dezaketen eragina eta esperientzia pertsonalen mahaigaineratzea; prekaritatean gorpuztea, gorputz indibidual eta kolektiboen dialektika, doktoretza plazeraren eremutik lantzeko proposamen eta hausnarketak.

Euskal Herriko hezkuntzan, euskal hezkuntzan eta doktoretzaren inguruko iruditegia zein politiketan ekarpena egin nahi luke ikastaro honek.

Ikastaro hau bereziki zuzendua dago ikerlariei, euskal unibertsitateen egoerei buruz interesa duen edonori, zein, unibertsitateaz harago, erakundeen norabidetze neoliberalaz kezkatuta dagoen edonori.