Programazioa denontzat: Python ikasi praktikaren bidez

Gaur egunean, programatzeak informatikarien gaitasun soila izateari utzi dio. Lanpostu askotan programatzeko gaitasuna eskatzen hasi dira informatikariak ez diren langileei ere. Informatikaria ez den edonork programatzeak eskaintzen dituen abantailak jaso ditzake, eta ordenagailuari esker ataza asko automatizatu ditzake lan-ordu asko aurreztuz.

Python programazio lengoaia gaur egun boga-bogan dagoen programazio lengoaia da. Bere sinpletasunak oso erakargarria egiten du eta edozer gauza inplementatzeko garatutako liburutegiek ezinbestekoa egiten dute edozein garatzailerentzat. Testuen prozesamendutik, estatistikara; web aplikazioetatik, datu-baseen kudeaketara, Pythonek guztientzat eskaintzen du irtenbide erraz eta azkarra.

Ikastaroan programatzen ikastea izango da helburu nagusia eta horretarako Python programazio lengoaia erabiliko dugu. Programazio jakintza oinarrizkoa izanik, ikasleak ikastaroaren sakontasun handirik gabe, programa txikiak ulertu, osatu eta moldatzeko gai izango da.

Ikastaroa online izango da, nagusiki. Aurrez aurreko 2 saio izango ditu , UEUren Ikastetxe Nagusian (Otaola hiribidea, 1. Eibar).

• Martxoaren 2an 17:30-19:30

• Martxoaren 10ean 17:30-19:30

Ikastaroaren helburuak honakoak dira:

• Algoritmo sinpleak diseinatzen ikastea

• Oinarrizko programak egiten ikastea

• Python programazio lengoaia ikastea

• Beste batzuen kodea ulertu eta aldatzeko gai izatea

0 Sarrera. Oinarrizko kontzeptuak

1. Oinarrizko datuak eta eragiketak.

2. Funtzioak

3. Baldintzak

4. Begiztak edo iterazioak

5. Datu egiturak

Ikastaroak metodologia parte hartzailea eta aktiboa izango du. Ikastaroak alde teorikoa eta praktikoa uztartuko ditu, ikasle bakoitzaren ikaskuntza-prozesuaren ibilbideari eta konpetentzien garapenari garrantzi handia eskainiz. Izan ere, partaidea bera izango da, interakzioa eta komunikazioa ardatz izanda, norbere ezagutzak eraikitzearen arduradun.

Ikastaroa emateko, Moodle irakaskuntza-plataforman oinarrituta dagoen UEUren Ikasgela Birtuala erabiliko da. Plataforma honen bitartez, ikasleek ikastaroko informazio, eduki eta jarduera guztiak eskura izango dituzte, eta komunikatzeko bestelako tresnak ere bai (foroak, esaterako). Tresna horiek ikasleen arteko elkarrekintza, eta ikasle-irakasle komunikazioa erraztuko dute.

Edukia zein ariketak Jupyter Notebook koadernoak erabiliz landuko dira. Ikasleak bere ordenagailuan ezer instalatu behar ez izateko Google Drive eta Ikasgela Birtuala erabiliko dira.

Ikastaroa nagusiki online izango bada ere, hasieran bi saio presentzial izango dira ikasketa prozesua bideratu eta azkartzeko. Ordenagailua bertara eramateko aukera egongo da lanketa modu lokalean egin ahal izateko.

Ikasleak momentu oro irakaslearen jarraipena eta tutoretza izango du, baita UEUko lantalde pedagogiko eta arduradun teknikoaren sostengua ere bai.

Programatzen ikasi nahiko lukeen edonorentzat. Ez da aurretik ezagutzarik izatea eskatzen.