Hizkuntza nahasmendua (TDL) Haur eta Lehen Hezkuntzan

Ikastaro hau erabat online da, ez dauka aurrez aurreko saiorik.

Gaur egun, eskola inklusiboen alde goaz eta hortaz, ikasle guztiei erantzuteko konpromisoa dugu profesional bezala. Hezkuntza-sistemak aniztasunari erantzutea du helburu eta horrekin batera, hizkuntzaren nahasmendua duten ikasleei arreta ematea, besteak beste.

Hizkuntzaren nahasmenduari buruzko ezagutza ezak ezaugarri hauek dituzten haurrei egunerokotasunean eskola erantzun aproposa ematea oztopatzen dute. Alde batetik, haur hauek identifikatzeko zailtasunak daude, eta euren ezaugarriak eta jokabideak gaizki interpretatzen dira. Ondorioz, eskaintzen zaien eskola erantzuna batzuetan ez da eraginkorra euren ikaskuntza prozesuetarako. Bestetik, identifikatuta dauden haurrekin lan egiteko metodoak eta teknikak zalantzan jartzen dira askotan, beti ez baitira eraginkorrak izaten.

Hori dela eta, ikastaro honekin, hizkuntzaren nahasmendua duten ikasleen esparrua lantzea proposatzen da, haien premietarako egokiak eta eskola inklusiboarekin koherenteak izango diren proposamenak egiteko. Azken finean, ikasle guztiei kalitatezko hezkuntza jasotzeko eskubidea bermatzea da, zalantzarik gabe, irakasleentzako gai nagusia.

Laburbilduz, ikastaro honen bidez, kontzeptuak argituko dira (hizkuntzaren nahasmendua duten ikasleen ezaugarri komunak ezagutuko ditugu), identifikaziorako gakoak eskainiko dira (diagnostiko eta identifikaziorako tresnak zein orientabideak emango ditugu) eta eskola erantzun eraginkorrerako gakoak aztertu eta proposamen desberdinak eskainiko dira, didaktika desberdinak abiapuntu hartuta (metodologia berritzaileak).

Informazio gehiago aurkituko duzue hurrengo elkarrizketan.

• Hizkuntzaren nahasmendua zer den ezagutzea eta gaiaren inguruko aurreiritziak eta mitoak ezagutzea.

• Hizkuntzaren nahasmendua duten ikasleen ezaugarriak eta premiak ezagutzea.

• Eskola eremuan detekzioa eta identifikazioa bideratzeko prozesua eta tresnak ezagutzea, tutore-familia elkarlanari esker.

• Eskola inklusiboaren ildotik erantzun egokiak bideratzeko proposamenak lantzea, hau da, gelarako esku hartzeak ezagutzea.

1. GAIA: Kontzeptua eta ikasleen ezaugarriak

• Hizkuntzaren nahasmendua

• Hizkuntzaren nahasmendua duten ikasleen ezaugarriak (kognitiboak, emozionalak, sozialak)

• Hizkuntzaren nahasmendua duten ikasleen inguruko aurreiritziak eta mitoak

2. GAIA: Ikasleen premiak eta detekzioak

• Hizkuntzaren nahasmendua duten ikasleen premiak

• Ikasle horiek antzemateko (detekzioa) prozesua eta tresnak

• Hizkuntzaren nahasmendua duten ikasleen beharrei erantzuteko ebaluazio psikopedagogikoaren prozesua ikastetxean

3. GAIA: Eskola eta familiaren harremana. NJP dokumentua

• Eskola eta familiaren arteko elkarlana eta koordinazioa

• Norbanako Jarduera Plana (NJP)

4. GAIA: Metodologia eta esku-hartzea

• Metodologia eta gelako praktika egokiak

• Esku-hartzea: baliabideak, estrategiak, materialak eta esku-hartzeko proposamenak

• Proiektua

Ikastaroak metodologia parte hartzailea eta aktiboa izango du. Partaideen aurre ezagutzetatik abiatuko da, eta ezagutza berriak eguneroko lan jardunean kokatzea izango du helburu, hausnarketa pertsonalak elkarbanatzean oinarrituz. Era berean, ikastaroak alde teorikoa eta praktikoa uztartuko ditu, ikasle bakoitzaren ikaskuntza-prozesuaren ibilbideari eta konpetentzien garapenari garrantzi handia eskainiz. Izan ere, partaidea bera izango da, interakzioa eta komunikazioa ardatz izanda, norbere ezagutzak eraikitzearen arduradun.

Ikastaroa emateko, Moodle irakaskuntza-plataforman oinarrituta dagoen UEUren Ikasgela Birtuala erabiliko da. Plataforma honen bitartez, ikasleek ikastaroko informazio, eduki eta jarduera guztiak eskura izango dituzte, eta komunikatzeko bestelako tresnak ere bai (foroak, esaterako). Tresna horiek ikasleen arteko elkarrekintza, eta ikasle-irakasle komunikazioa erraztuko dute.

Oinarri kontzeptualak idatzizko zein ikus-entzunezko materialekin landuko dira. Ondoren, jorratutakoaren inguruko jarduera praktikoak proposatuko dira, ikasleen parte hartzea eta hausnarketa kritikoa bultzatuz. Maila pertsonalean gogoetak sustatzea ez ezik, hausnarketa kolektiboetara salto egiteko planteamenduak ere sustatuko dira, horretarako talde dinamikak edo talde foroak erabiliz. Ikastaro amaieran, ikastaroko gaitasun eta konpetentzietan oinarritutako proiektua garatuko da.

Ikasleak momentu oro irakaslearen jarraipena eta tutoretza izango du, baita UEUko lantalde pedagogiko eta arduradun teknikoaren sostengua ere bai. Ikastaroak jarraituko duen ikaskuntza-prozesua autonomoa eta esanguratsua izan arren, irakaslearen lankidetza eta laguntza izango dute, sortzen zaizkien zalantzei eta zailtasunei aurre egiteko.

Ikastaro hau Haur eta Lehen Hezkuntzako irakasle, hezitzaile, PT, kontsultore zein orientatzaileei zuzenduta dago, bereziki, Pedagogia Terapeutikoko eta Entzumena eta Mintzairako irakasle espezialistei.