DBHko Natur Zientziak, Teknologia eta Matematika espezialitateetako irakasleen pertzepzioa STEM ereduarekiko

Azterlan hone xede nagusia da Derrigorrezko Bigarren Hezkuntza etapako irakasleek STEM hezkuntza-ereduarekiko duten pertzepzioa aztertzea, irakaskuntza-ikaskuntza prozesuen ezarpenean eragina duelako. Alegia, irakasleak STEM ereduaren ezarpenaren eragile nagusiak izanik, gauzatuko dituzten praktikak marko horren inguruan duten pertzepzioaren araberakoak izango dira. Helburu hori betetzeko asmoz, Gipuzkoako sare guztietako 5 ikastetxetako Natur Zientziak, Teknologia eta Matematika ezagutza-arloetako 12 irakasle sakonki elkarrizketatu dira, aldez aurretik diseinatutako gidoi bat erabiliz. Emaitzen arabera, elkarrizketatutako irakasleek STEM hezkuntza-ereduaren antzeko ikuskera dute, eta, batez ere, STEM proiektuak diseinatu, ezarri eta ebaluatzeko denbora, baliabideak eta kalitatezko prestakuntza behar direla adierazi dute, aldez aurreko ikerketa ugarik ondorioztatu bezala.