IkerGazte: Nazioarteko ikerkuntza euskaraz (2021)

IkerGazte2021!

Pasa dira beste bi urte, eta ia konturatu gabe IkerGazteren 4. edizioa ate joka dugu berriro ere. Konturatu gabe pasa direla esatea askotxo esatea da, 2020. urtearen hasieratik bizitzen ari garen zurrunbilo hau arrasto ezabaezina uzten ari baita gure gizartean. Badakigu 2021a ere ez dela erraza izango, baina ikergazteok, gora bihotzak eta heldu diezaiogun Gasteizen egingo dugun IkerGazte2021 honi inoizko grina eta ilusio handienaz!

2015.eko 1. edizio hartatik lan asko egin dugu elkarrekin eta erronkak erronka 4. ediziora heldu gara, ez gara ez makalak! 2021eko edizio hau berezia izango dela zalantzarik ez dugu; beste ezeren gainetik topagunea da IkerGazte eta aurrez aurreko topagunea izan dadin gure eskuetan dagoen guztia egingo badugu ere, online egin beharko bagenu ere, IkerGazte2021 egin egingo dugu. IkerGazterik gabeko biurtekorik ezin dugulako irudikatu, jada erreferente garelako. Eta IkerGazterik ez dagoenez zure ekarpenik gabe, UEUren eta Kongresuaren Batzorde zientifikoaren izenean 2021eko ekainaren 9-11an Gasteizen egingo dugun IkerGazte2021era gonbidatzen zaitugu.

IkerGazte kongresuaren aurreko edizioen inguruan gehago jakiteko:

• IkerGazte2015 kongresuaren laburpen bideoa.
• IkerGazte2017 kongresuaren laburpen bideoa.
• IkerGazte2019 kongresuaren laburpen bideoa.

Informazio guztia eta eguneratua IkerGazte webgunean topatuko duzu.

Oharra: 2021eko maiatzaren 18a, 20:00 : TALDEA BETE DA. Hemendik aurrera ematen diren izenak ITXARON ZERRENDAN sartuko dira.

Helburuak

Aurreko kongresuetan bezala, ikertzaile gazteak bildu eta ikusgarritasun handiagoa ematea izango da laugarren kongresuaren xede nagusia. Gazte diogunean ibilbide zientifikoaz ari gara; ikerketa lan baten egile zaren horri, tesia bukatzen ari zaren horri edo azken lauzpabost urteetan amaitu duzun horri zuzenduta dago kongresua.

Horrez gain, beste bi helburu ere baditugu:

• Ikertzaileen arteko SAREA egituratzea.
  • Ikertzaileen arteko harremanak sendotuz gero, elkarlana bultzatzea dugu helburu.
• Euskarazko zientzia produkzioa AREAGOTZEA.

Edukiak

(Informazio guztia eta eguneratua, http://www.ueu.eus/ikergazte helbidean)

Asteazkena, ekainak 9

• 08:10-09:00 Harrera mahaia irekiko da
• 09:00-09:30 Harrera ekitaldia eta ongietorria
• 09:30-10:30 Hitzaldi gonbidatua: Katy Deepwell (Middlesex Unibertsitatea)
• 10:30-11:15 Hitzaldi gonbidatua: “Hizkuntza teknologiaren bilakaera: IXA taldearen esperientzia. Erabili zientzia gure gizartearen alde.“ Arantza Diaz de Ilarraza (UPV/EHU, UEU)
• 11:15-12:00 Atsedenaldia
• 12:00-14:15 Mikroaurkezpenak
• 14:15-16:15 Bazkari etena
• 16:15- 17:50 Solasaldia: “Ezagutzaren dibulgazioa, ahalduntzeko tresna”
• 18:00-20:00 Saio osagarriak
  • Gasteiz eta Arabako historia, herri mugimenduak eta euskalgintzako eragileak ezagutzeko aukera.

Osteguna, ekainak 10

• 09:00-10:00 Hitzaldi gonbidatua: “Datuen zientziak COVID-19aren aurkako borrokan”. Nuria Oliver (Telekomunikazio ingeniaria eta Inteligentzia Artifizialeko doktorea)
• 10:00-11:15 Mikroaurkezpenak
• 11:15-12:00 Atsedenaldia
• 12:00-14:15 Ahozko aurkezpenak
• 14:15-16:15 Bazkari etena
• 16:15- 17:50 Mahai ingurua: “K++: Koronabirus osteari buruz esandakoei atzera begirada”
• 18:00-20:00 Saio osagarri berezia eta afaritxoa

Ostirala, ekainak 11

• 09:00-10:00 Hitzaldi gonbidatua: “Biomaterial eta material biologikoen propietate fisikoak”. Eneko Axpe (Marie Curie doktore osteko ikertzaile bekaduna Stanford University-n, NASA, UPV/EHU)
• 10:00-11:15 Mikroaurkezpenak
• 11:15-12:00 Atsedenaldia
• 12:00-13:30 Sari banaketa eta Amaierako ekitaldia

Metodologia

Programa akademikoa 4 saio motak osatuko dute: hitzaldi orokorrak, ahozko komunikazioak, posterrak eta mahai inguru edo solasaldiak.

Hitzaldi orokorrak:

• Ikerketari edo euskarazko ikerketari edo baliabide orokorrei (dokumentazioa, inbertsioak...) lotutako hitzaldiak
• Omenaldi eta errekonozimenduak
• Lan erreferentzialen inguruko hitzaldiak
• ...

Ahozko aurkezpenak eta posterrak:

• Tesiak eta tesinak (bukatuak zein bidean)
• Bukatutako proiektuak (emaitza zehatzak dituztenak). Postdok moduan egindako proiektuak edo zentro teknologikoetan egiten direnak ere sartzen dira atal honetan.

Ahozko eta posterretako programa arlokako batzordeek erabakiko dute.

AHOZKO AURKEZPENAK 5 jakintza arloetan banatutako aurkezpenak izango dira, paraleloan programatuko direnak ekainaren 10ean.

Osasun egoerak bultzatuta aurtengo edizioan ahozko aurkezpenez gain, POSTERRAK formatu digitalean eskegiko dira IkerGazte webgunean posterretarako sortu dugun atalean. Posterren mikroaurkezpenak 3 egunetan banatutako  aurkezpen multidiziplinarretan banatuko dira.

Mahai inguru eta solasaldiak:

Bi mahai inguru edo solasaldi izango dira, disziplinartekoak eta ikertzaile guztientzat interesgarri izango direnak, ekainaren 9 eta 10ean.

ARGITALPENA

Onartutako artikului guztiak 5 jakintza arlotan banatutako argitalpenean argitaratuko dira.

Osasun larrialdia dela eta, onartutako aurkezpen guztiak ezingo dira IkerGazten, Gasteizen aurkeztu, Baina ahozko zein poster digitalean daudeank guztiak argitalpenean jasoko dira.

Nori zuzendua

• Tesia bukatzen ari zaren horri edo azken lauzpabost urteetan amaitu duzun horri
• ikerkuntzako azken joerak eta lanak ezagutu nahi duzun horri
• ikerkuntzako ibilbidea hasi nahi duzun horri
• ikerketa-taldeko ardura duzun horri
• edozein ikertzaileri

Matrikulaziorako argibideak

Oharrak

Zuen arteko elkarlana sustatzeko asmoarekin, partaideen posta elektroniko helbideen zerrenda bat osatuko da, eta jardunaldian banatuko da. Ez baduzu nahi zure helbidea zerrenda horretan agertzea, jakinarazi iezaguzu mesedez.

Etiketak