Ikastaroak :: Sexologia

Sexu-hezkuntza lantzen haur hezkuntzan eta lehen hezkuntzan

  • Hasiera-data: 2021(e)ko irailaren 27a
  • Amaiera-data: 2021(e)ko azaroaren 8a
  • Tokia: Ikasgela Birtuala
  • Ordutegia: Astelena-ostirala. 00:00-24:00
  • Izaera: On-line
  • Ordu kopurua: 30.00 ordu
  • Matrikula-epearen hasiera: 2021(e)ko irailaren 1a
  • Matrikula-epearen bukaera: 2021(e)ko irailaren 22a

Ikastaroa BETE egin da. Interesa izanez gero, izena eman eta itxaron-zerrendan sartuko zara.

Ikastaroa guztiz online izanen da.

Pertsona guztiak sozialak gara, gorputza dugu eta honen bidez pentsatu, ulertu, adierazi, komunikatu, gozatu, sentitu eta sentiarazten dugu.

Sexualitatea, hitzekin eta gorputzaren zentzumenekin bakoitzak espresatu, komunikatu, sentitu, intimatu, plazera eman eta jasotzeko modua da. Sexualitatea, beraz, pertsonaren dimentsio bat baino gehiago da: garena da. Horregatik, sexualitatearen garapen integrala eta atsegingarria bermatzea, pertsonaren garapena osotasunean laguntzea da. Hortaz, hezkuntza sexuala, haurren eta gazteen hazkuntza integrala lortzeko alderdi garrantzitsua da.

Ukitu, plazera eman eta intimatzeko behar fisiko eta afektiboek, jaiotzatik heriotzaraino laguntzen gaituzte. Baina pertsonok sentsibilitate desberdinak ditugu eta ez zaizkigu afektu adierazpen berdinak gustatzen, horregatik da beharrezkoa hainbat gaitasun lortzea: besteak eta norbere burua entzutea, zer nahi dugun eta zer ez dugun nahi eta zer gustatzen zaigun eta zer ez zaigun gustatzen jakitea, nahi eta sentitzen dugun bezala egin eta disfrutatzea, norberari eta beste inori minik eman gabe…

Haur eta gazteek osotasunean heziak izateko eskubidea dute maila guztietan, sexualitatea komunikazio, osasun, plazer eta afektibitate iturri bezala ulertuz.

Emakumeak eta gizonak parekidetasunean eta diskriminaziorik gabe biziko garen jendartea lortu nahi badugu eta harreman komunikatzaile, atsegin, berdintasunezko, arduratsu eta askeak lortu nahi baditugu, haurrei kalitatezko heziketa sexuala eskaini beharko diegu.

Honen faltak norbanakoaren garapenean eragina izan ez ezik, parekidetasunean oinarrituriko jendartearen eraikuntzan behar diren oinarrizko aldaketa sozialak ematea eragotziko baitu.

Sexu-heziketak, esan bezala, pertsona gisa hazten laguntzen gaitu, baina arlo biologikoan zentratzen bagara soilik, pertsonalitate gizakoia eraikitzeko aukerak eta kasu askotan aurreiritzi eta estereotipo sexistez beteta dauden ideiak aldatzeko aukerak ukatuko ditugu.

Horregatik, ikastaro honen helburua Haur Hezkuntzako bigarren zikloko eta Lehen Hezkuntzako etapa guztietan dimentsio sexuala modu praktikoan lantzeko gakoak ematea izango da.

Ikastaroaren metodologia oso praktikoa izango da, helburua norberak bere ikastetxean hezkuntza sexuala lantzeko proiektu bat egitea delako; eta praktikotasunari dagokionez, horrek inpaktu zuzena izango duelako norberaren hezkuntza ekosistema propioan, hau da, komunitatean.

Ikastaro amaieran, proiektu horiek taldean partekatuko dira, proposamen desberdinekin ikasle bakoitzak bere proiektua aberasteko aukera izango duelarik.

Gainera, proiektuek ekarriko dituzten emaitzek, lotura zuzena izango dute etapa guztietako haurrek eskuratuko dituzten konpetentziekin. Zehazki, Nafarroako Haur Hezkuntzako bigarren zikloko eta Lehen Hezkuntzako curriculumek barnebiltzen dituzten arlo, helburu eta eduki askorekin. Bai eta 2017-2021 Hezkidetza Planaren baitako SKOLAE programarekin ere.

Irakaslea

  • Ibai Fresnedo Moreno

    Sexu-hezitzailea, Indarkeria Sexistaren Prebentzioan eskarmentuduna, Genero Berdintasun teknikaria, Hezkidetza Programetan aritua, gizarte eta kultur dinamizatzailea eta EHko Sexu Askapenerako Mugimenduan militantea. UEUkidea.

Helburuak

• Sexu-hezkuntzaren oinarriak ezagutzea.

• Gorputzei eta izateko orotariko moduei zentzua eta esanahia ematea.

• Sexualitateari eta sexu harremanei lotutako gaiei buruz hitz egiteko konfiantzazko eremu seguruak sortzea.

• Sexuaren eta generoaren estereotipo eta rolak aztertzea eta nola eragiten duten ikastea.

• Haur eta gazteen garapen afektibo-sexuala genero ikuspegitik lantzea.

• Sexualitatea gorputzean bizi izateko moduaren garrantziaz eta sexu heziketa curriculumean txertatzearen garrantziaz jabearaztea.

• Ikasgelan sexualitatea zelan landu ikastea.

• lkastetxeei sexu-heziketaren inguruko tresnak eskaintzea, eta pertsonei era positiboan eta berezian elkar ezagutzen, bizi izaten eta adierazten laguntzea.

• Adin eta etapa guztietan LGTBI+ parekidetasuna eta aniztasun sexuala lantzen ikastea.

• Sexu-heziketa eta sexu-aniztasuna lantzeko baliabide pedagogikoak ezagutzea.

• Irakasleek sexu-heziketa lantzeko unitate didaktikoa sortzea.

• Ikastaroari dagokionean, Moodle plataformaren atal eta baliabide desberdinak ezagutzea eta norberaren gaitasun digitala indartzea

Edukiak

1. Sexualitatea gure gizartean

• Ikastaroaren eta Ikasgela Birtualaren aurkezpena.

• Sexualitatearen historia: nondik gatoz eta nora goaz?

• Sexualitatearen ulerkera gure gizartean: ikuspegi anitzak eta hauen eragina.

• Sexu berezitasunen aitortza eta balorazioa.

2. Haurren garapen afektibo-sexuala

• Giza izate sexuala.

• Haur eta gazteen ezaugarri afektibo eta sexualen garapena etapa guztietan.

• Sexu eta generoen arteko hierarkizazioa.

• Generoaren eragina sexualitatearen eraikuntzan.

• Hezkidetza eta sexualitatea: parekidetasuna lortzeko pedagogia askatzaileak.

3. Sexu-heziketa eta sexu-aniztasuna ikastetxean

• Zertaz ari gara sexu-heziketaz ari garenean?

• Sexu-hezkuntzarako eremuak, helburuak eta edukiak.

• Helduon heziketa propioaren araberako etengabeko transmisioa: Curriculum ezkutua.

• Sexu-heziketa jorratzeko gako eta gomendio praktikoak.

• Haurren transexualitatea.

• Sexu-aniztasunari buruzko hiztegi inklusiboa.

• Ikastetxeetan sexu-aniztasuna lantzeko baliabideak.

4. Proiektuaren diseinua

• Norbere ikastetxearen beharren identifikazioa.

• Sexu-heziketa curriculumean eta ikasleen oinarrizko konpetentzietan.

• Sexualitatea lantzeko proiektuaren edo unitate didaktikoaren diseinua.

• Sexu-heziketa zeharka lantzeko baliabideak eta tresnak.

5. Proiektuaren aurkezpena eta ebaluazioa

• Proiektuaren edo unitate didaktikoaren aurkezpena.

• Proiektua edo unitate didaktikoa ikastetxean txertatzeko urratsak.

• Ebaluazioa.

Metodologia

Ikastaroa emateko UEUko ikasgela birtuala erabiliko da eta guztiz online izango da.

Plataforma honen bitartez, ikasleek ikastaroko informazio, eduki eta jarduera guztiak eskura izango dituzue, eta komunikatzeko bestelako tresnak ere bai (foroak adibidez). Tresna horiek ikasleen arteko elkarrekintza, eta ikasle-irakasle komunikazioa erraztuko dute.

Ikastaroa parte-hartzailea eta praktikan oinarritutakoa izango da. Oinarri kontzeptualak idatzizko zein ikus-entzunezko materialen bidez landuko dira. Ondoren, landutakoaren inguruko praktikak proposatuko dira, ikasleen parte-hartzea eta hausnarketa kritikoa bultzatuz. Amaieran, ikastaroko gaitasunetan oinarritutako proiektua burutuko da, ikastaroa borobilduz. Era berean, foroetan norberaren iritzi, hausnarketa, esperientzia edota zalantzak ikaskideekin partekatzeko aukera izango da, taldeari modu eraikitzailean eraginez. Horregatik, zuen parte-hartzea funtsezkoa da. Ikaslea da ikasgela birtualaren benetako protagonista eta, ondorioz, zuek izango zarete, interakzioa eta komunikazioa ardatz izanda, norberaren zein taldeko ezagutzak eraikitzearen arduradunak.

Era berean, momentu oro irakaslearen jarraipena eta tutoretza izango duzue. Ikastaroak jarraituko duen ikaskuntza-prozesua autonomoa eta esanguratsua izan arren, irakaslearen lankidetza eta laguntza izango duzuela, sortzen zaizkizuen zalantzei eta zailtasunei aurre egiteko.

Ikastaroa amaitzean, ikastaroaren aprobetxamenduari buruzko datuak aztertuko dira: ikasle bakoitzak plataformara egindako atzipenak, egindako jarduerak, parte-hartzearen jarduera asinkronikoetan (eztabaida-foroak) eta abar.

Nori zuzendua

Izen-ematea publiko zabalari irekia dago baina unibertsitatean ikasten dabiltzan nafar ikasleek izango dute lehentasuna. Edozein etapako irakasleei zuzenduta dago.

Matrikulaziorako argibideak

• Ikastaroa DOAKOA da.

Matrikulatu aukera sakatu (goian dago, izenburuaren azpian) eta bertan agertutako zaizun fitxa bete.

• Matrikula-orria bete ondoren, zure posta elektronikoan mezu bat jasoko duzu, matrikulazioa eta ordainketaren inguruko argibideekin.

• Ez baduzu mezurik jasotzen, akatsen bat egon da. Horrela bada, jarri gurekin harremanetan: 948 362563, nafarroa@ueu.eus, (Edurne).

Hemen UEUren matrikulazio-araudi orokorra.

Diru-laguntzen informazioa.

Oharrak

Homologazioa

Ikastaro hau Nafarroako Gobernuko Hezkuntza Departamentuak, irakasleen etengabeko prestakuntza gisa homologatu du.

Homologazio-zenbakia: 101/2021, martxoaren 31koa. Hiru kreditu (3) eskuratu ahal izango dira.

Halaber, ikastaro hau egiteagatik, Nafarroako Unibertsitate Publikoak (NUP) ECTS bat (1) emango die ikasleei. Horretarako, NUPeko erregistro orokorrean aurkeztu beharko dute instantzia orokorrarekin batera, UEUren bertaratze ziurtagiria.

Ebaluaziorako irizpideak

Ikastaroko parte-hartze ziurtagiria lortzeko honako baldintzak bete beharko ditu ikasleak:

• Ikastaroan, gutxieneko % 85eko aprobetxamendua izatea.

Onartuak izateko irizpideak

Ikasleak onartuak izango dira irizpide honen arabera: izen emate epea zabaldu eta lehenengo 15 egunetan izena ematen dutenen artean, lehenik, unibertsitateko nafar ikasleak, gero gainontzeko nafarrak eta azkenik, beste lurraldetakoak.

15 egun horiek pasata, taldea osatu arte onartuko dira ikasleak.

Onartuak izateko irizpideei jarraiki, irailaren bigarren hamabostaldian jakinaraziko dugu zeintzuk izan diren onartutako ikasleak, hauei helbide elektronikora mezua bidaliz. Gainontzekoak itxaron zerrendan geratuko dira eta bajaren bat suertatuz gero, beraiekin harremanetan jarriko gara.